السلام عليكم ورحمة الله
لعل اسم الموضوع يثير انتباه الجميع وخاصة بعد التطورات الأخيرة التي مرت بها البلد ولكن اقرأ معي تلك السطور التي أسطرها والأسى يملؤني والألم يعتصرني ثم بعد ذلك حاول أن تضع معي حدا لهذا .
أولا :-
لا أنكر أن من سائقي ميانه من امتلأ أدبا واحتراما للآخرين.
ثانبا:-
قف على الموقف ساعة من زمان ثم تأمل حال السائقين وتسائل هل يسرك حالهم .
ثالثا :-
اقرأ هذه المواقف وأنا فيهما شاهد عيان
الأول :- ركبنا معه من اهناسيا وآثرناه على غيره وقلنا ابن بلدنا أولى وسار بنا في سيارته يترقص بها ساعة ويسير بها بسرعة شديدة ساعة لا تتعجب فإنه من الشباب أقصد العيال اللي لسه طالعه من حقه العيب على اللي علمه ( مش مشكلة خالص أرواح الناس ) كل هذا سهل ثم كانت المفاجأة وقف بينا على الكوبري وبيلم أجرته , كام الأجرة _ على فكرة احنا كنا ماشيين من على قلها _ قال الأجرة 75 قرش ليه يا بني سواقين قلها بيركبوا بنص , خلاص مش عاجبكم انزلوا هنا ونزلنا _ لا تتعجب قلة أصل
(على فكرة للأمانة الكلام ده كان قبل الثورة )
2- مرض والدي مرضا شديدا جدا اضطررت أن أبحث عن سياره توصلنا أي مستشفى رحت الموقف فلم أجد سيارات (هذا الأمر كان ليلا حوالي الساعة 2.5 ) رحت بيوت السواقين اللي أروح له معلهش أنا عندي أنفار الصبح , إلى أن ذهبت إلى واحد ظننت فيه أنه سيكون أفضل من غيره قلت له إن أبي مريض جدا وعاوزك توديه المستشفى قال لي روح لبتاع الصيدلية خليه يديلوا حقنة جنب , قلت له الدكتور منعوا من المسكنات لازم يروح مستشفى دلوقتي تتخيل انو سابني على الباب واقف ودخل نام وساعتها كان القرآن بدأ , رجعت البيت سألني أخي أين العربية قلت له مفيش خلينا للصبح الله المستعان
الثاني :-
كنت في اهناسيا وقلت خلاص البلد اتفقت كلها على إن الركوب من على ميانه ودي حاجة طيبة رحت أركب من على بلدنا ويا ريتني ما رحت فضلت راكب في العربية حوالي عشر دقائق بدأت العربية تشحن وبالفعل فيه ناس ركبت معانا وفجأة
شابين وقفوا مع السواق حوالي دقيقتين , ثم رجع إلينا السواق ودار هذا الحوار
السواق : لو سمحتوا ممكن تنزلوا من العربية عشان عندي مشوار
الركاب : بتقول ايه
السواق : عندي جهاز هوصلوا
الركاب : طب واحنا هنروح فين ( على فكرة مفيش عربيات على الموقف إلا هو )
السواق : بقول انزلوا عشان ورايا مشوار والعربية لسه مشحنتش
الركاب : هبه قلت الأصل اللي فيكم مش هتسيبكم ؟ تركنا السواق ومضى
ثم بعد مرور بعض الوقت ضغط أحد الركاب على زمارة العربية
السواق : طل من زجاج العربية
الركاب : يللا وصلنا مخصوص
سابنا ومشي وقال ياللا يا بني نخلع الكبوت
طبعا اللي حصل إن الركاب تركوا الموقف وراحوا ركبوا من على قلها
وتعقيبا على ما حدث فإني أقول إن ركاب ميانه سيظلوا يركبون من على قلها لأن السواقين زي ما همه لم يتغيروا وكلها أقل من شهر ويخلعوا الكبوت ويودوا القمح وغيره وقابلني إن لقينا علبيات ميانه على الموقف وساعتها ترجع ريما لعادتها القديمة
والحل إن سواق ميانه يركب كبوت نظيف يليق بالناس ومينفعش يتخلع عشان لما نروح الموقف نلاقيهم
واللي عنده اقتراح ممكن يقوله